ی غنچه دهن،سیم بدن،دلبر طنّاز!
ای سرو سرافراز!
ئؤلدؤم داخی،قوربانین اولوم!رحم ائله بیر آز!
بسدیر بو قده ر ناز
یاندیم،کؤله دؤندؤم،یاناسان سن ده منیم تک
ای دختر ترسا
اول ناکس ایله اولما داخی همدم و همراز
والله بئله اولماز
آدم کیمی چوخداندیر اولوب ورد زبانیم
یاربّی ظلمنا!
آمما کی نه حاصیل او جفا پیشه اینانماز
بیر دم منه باخماز
سن بؤیله بیلیردین کی ئؤزؤن عاشیق اولوبسان
کؤل باشینا اولسون!
دور پؤفله اوجاغی،بو اودون یاشدیر،آلیشماز
ئوز باشینا یانماز
مین داغی اگر بیر نفسه جانیما قویسا
بیر اوف دئمرم من
آمما اونو گؤر بیر جه منی یانینا قویماز
بیر بوسه ی قییماز
فالدی داخی چؤن محشره بو حسرت دیدار
ای یار وفادار!
باری هر ایکی ایلده سوروش حالیمی آز-ماز
یا بیر جه کاغیذ یاز
طوطی کیمی فریاد ائلرم خسته و رنجور
بو کؤنج قفسده
بیر پسته ایله کیمسه منی یادینا سالماز
بیر کؤنلؤمؤ آلملز
ای بؤلبؤل بیچاره!فغان ائتمه دمادم
صبر ائیله دوت آرام
دائیم کی قیش اولماز،مئی همیشه بئله قالماز
البته گلر یاز
أؤز وورما،منی سئیر گؤلؤستانه آپارما
ای همدم جانی!
یؤز فصل باهار اولسا،مینم کؤنلؤم آچیلماز
بو کئفدن آییلماز
یاریم یئنه مندن کؤسؤبن آجیق ائدیبدیر
اوخ!اوخ!آمان الله!
بیلمم نه قیلیم،چاره نه دیر،بیر أؤزؤن آچماز
بیر کلمه دانیشماز
کؤنلؤم ائوینی لشکر غم ائیله دی ویران
ساقی سنه قوربان!
دور وئر کی بو سیسقا بیر-ایکی جامیله دویماز
تا دؤشمه سه،قانماز
سال غؤلغؤله،بو گنبد افلاکه،خروش ائت
ای دف زن چابک!
مطرب!داخی سن شدّ ائله بیر نغمه ی شهناز
ای مرغ خوش آواز
هر نه دئیه جکسن،ده گیلن،جانیما خوشدور
ای زاهید بد کیش!
دریایا داش آت،یاقایا سال،ذرجه داشماز
هرگیز کی بولاشماز
باخما کی بئله عاجیز و میسکیندی نباتی
هی!هی!حذر اوندان!
مولا بیلی،یوخدور ئؤزؤتک ریند نظر باز
عیّار چپ انداز!
حکیم نباتی
گؤزؤنؤ آچ گؤر ای طالیب!علی دیر دؤنیایا سرور
محمد عئشق دریاسی،علی دیر،قیمتی گؤوهر
محمد علمه کان اولدو،علی نؤطق و بیان اولدو
آنا سیرلر عیان اولدو،علی دیر خواجه ی قنبر
علی دیر جؤمله نین جانی،محمد دیر آنین کانی
حقیقتدیر علی شانی،علی دیر یار پیغمبر
هزاران دؤرلؤ جنبشلر،علی امری ایله ایشلر
واریر یایلار،گلیر قیشلار،علی دیر یار پیغمبر
علی اوّل،علی آخیر،علی باطین،علی ظاهیر
علی دیر نور ایلن انور،علی دیر شمس مستنور
نه بیلسین جاهیل و نادان،محمد یا علی کیمدیر!
محمد صاحب دیندیر،علی دیر جؤمله دن بهتر
علی دیر جنبش هر جان،علی دیر جان و دل مهمان
علی راحیم،علی رحمان،علی دیر جؤمله یه رهبر
علی عین عینایت دیر،علی نور هدایت دیر
علی میر بشارت دیر،علی دیر شاه هر صفدر
علی واحید،علی اوحد،علی فرض و علی سنّت
علی دیر جؤمله یه رحمت،علی دیر شافع محشر
علی سبحان،علی سولطان،علی جنّت،علی رضوان
علی دیندیر،علی ایمان،علی دیر میر هر لشکر
علی وصفی دؤرؤر حیدر کی آلدی قلعه ی خیبر
علی دیر قاتل عنتر،علی دیر میر هفت کشور
نسیمی نین دل و جانی منوّردیر علی نوره
علی والی،علی والا،علی سرور،علی صفدر
شهید نسیمی
دوتموشام جان نقدین الده وصل جانان ایسترم
تشنه جان وئررم منای عشقده جان ایسترم
دم به دم ائیلر تجلا پرتو انوار ذات
اولمارام موسی کیمی بیر جلوه ایله محو مات
خضر تک بو عرصه ده آختارمارام آب حیات
تشنه ی وصلم کؤنؤل جامین دولو قان ایسترم
طشت دشت ایچره قیزیل قانیم آخار یحیی کیمی
کربلا میدانی دولموش قانیلن دریا کیمی
زینبیم اولسون پریشان خاطر لیلا کیمی
پای بند زلف اکبردیر پریشان ایسترم
طایر اوج وفایم،شهپریم تیر جفا
ائیلرم روز ازلده ائتدیگیم عهده وفا
بو لب عطشانیلن اوللام ذبیحاً من قفا
خنجر قاتل دمیندن آب حیوان ایسترم
گلشن جسمیم ده زخم تیر آچیلمیش گؤل کیمی
هر طرف پیکان دؤزؤلمؤش سینه مه سنبل کیمی
ایسترم گلسین سکینه م ناله یه بلبل کیمی
قتلگه گلزارینه مرغ خوش الحان ایسترم
مین بلایه مبتلا اولسام اگر ایّوب تک
ائیلرم صبر،ائتمرم شور و نوا یعقوب تک
دم به دم،ساعت به ساعت،عاشق مجذوب تک
بیر بلایه وئرمگه شوقیله مین جان ایسترم
کسب ائدیب مرآت دل نور محبّت لن جلا
اولموشام سر مست جام "البلاء ُ للولا"
بزم وحدتدیر منه بو سرزمین کربلا
ترک کثرت ائتمگه بیر نوک پیکان ایسترم
بیر طرفده کاکل اکبر بویانمیش قانیله
بیر طرفده اصغریم سیراب اولوب پیکانیله
بیر طرف،جان وئردی عبّاسیم لب عطشانیله
بیر طرف ئوز جیسمیمی خاکیله یکسان ایسترم
جلوه گاه محضرینده ائیلرم سعی و صفا
خیمگه میقات و مشعر،قتلگه کوه منا
ایستمم بیر اکبر و عبداللّهیم اولسون فدا
بو بلا دشتینده یئتمیش ایکی قربان ایسترم
شعله ی نار محبتله دولوب کانون دل
وادی حیرتده لیلا آختاریر مجنون دل
مجلسیم خلوت،گؤزؤم یاشلی،شرابیم خون دل
گئلمگه بو بزمه بیر تازه مسلمان ایسترم
بیر یئتیش فریادیمه ای پادشاه کم سپه
زورق جسمیم اولوب مستغرق بحر گنه
گر چه صرّافم،ذلیلم،روسیاهم خون شبه
عرصه ی محشرده سندن الده فرمان ایسترم
صراف تبریزی
آنا یوردوم ، آذربایجان
بیر اوشاغام، آنام ســـن ســــن
خسته اولسام، داوام سن سن
آغاج اولسام،هاوام ســــن سن
اورک ائــــویم سنســـیز تــــالان
آنا یوردوم، آذربایجان
جئیران اولسام ، سن داغیمسان
بولبول اولسام،سن باغیمســــان
سونبول اولسام،تورپاغیمـــــسان
ســــرین سولار،سندن آخـــــان
آنا یوردوم آذربایجان
آغ بـــــــولوتلار، یور قانیندی
مـــــرد اوغوللار قوربانیـندی
یول گورسدن ، قورآنینـــدی
دوشمن لری ، درده سالان
آنا یوردوم آذربایجان
من آرازام ، ســن خزرسن
آغیزلاردا، چوخ گـــــزرسـن
هر آفت دن ، بر حذر سـن
قار-یاغیشلار ، سنه یاغان
آنا یوردوم ، آذربایجان
قول-قانادیم ، هوسیم سن
یورولمایان ، نفسیم ســـن
من اوره یم ، قفسیم سن
منه دایاق ، کومــک دوران
آنا یوردوم ، آذربایجان
من قوش اولسام ، سن پریم سن
زرگـــــر اولسام ، ســـن زریم سن
عاشیق اولسام ، دیل بریم ســـن
عاشیق لری ، ســــای سیز اولان
آنا یوردوم ، آذربایجان
گوزَللــــــرین ، گوزَلی ســـن
داد لی-دوزلـــو مزه لی سن
شاعیرین شعر ، غزلی سن
آدین سنـین ، دیلــــده قالان
آنا یوردوم ، آذربایجان
آنا یوردوم ، آذربایجان
آذربایجان، آذربایجان
چوخ کئچمیشه م بو داغلاردان
دورنا گوزلی بولاقلاردان
ائشیتمیشه م اوزاقلاردان
ساکت آخان آرازلاری
سینامیشام دوستی یاری
ائل بیلیر کی سن منیم سن
یوردوم یووام مسکنیم سن
دئمه ک دوغما وطنیم سن
آیریلارمی کونول جاندان
آذربایجان، آذربایجان
من بیر اوشاق، سن بیر آنا
اودور کی باغلی یام سانا
هانکی سمته، هانکی یانا
هی اوچسامدا یووام سن سن
ائلیم، گونوم، اوبام سن سن
فقط سندن گن دوشنده
آیریلیق مندن دوشنده
ساچلاریما دن دوشنده
بوغاز آیلار، ایللر منی
قیناماسین ائللر منی
داغلارینین باشی قاردیر
آغ اورپه گین بولوتلاردیر
بویوک بیر کئچمیشین واردیر
بیلینمه ییر یاشین سنین
نه لر چکمیش باشین سنین
دوشدون اوغورسوز دیللره
نحس آیلارا، نحس ایللره
نسللردن نسللره
کئچن بیر شهرتین واردیر
اوغلون قیزین بختیاردیر
هی باخیرام بو دوزلره
آلا گوزلی گوندوزلره
قارا خاللی آغ اوزلره
کونول ایستر شعر یازا
گنجله شیرم یازا یازا
بیر طرفین بحر خزر
یاشیل باش سونالار گزر
خیالیم دولانار، گزر
گاه موغانی، گاه ایلداری
منزل اوزاق، عمریم یاری
سیرا داغلار گن دره لر
اوره ک آچان منظره لر
جیران قاچار، جویور مه لر
نه چوخدور اویلاغین سنین
آرانین، یایلاغین سنین
کئچ بو داغدان بو آراندان
آستارادان لنکراندان
آفریقادان هندوستاندان
قوناق گلیر بیزه قوشلار
ظلم الیندن قورتولموشلار
بو یئرلرده لیمون ساری
اگیر، سالیر بو داقلاری
داغلارینتین دوم آغ قاری
یارانمیشدیر قارلی قیشدان
بیر سنگردیر یارانیشدان
لنکرانین گولی رنگ رنگ
یوردوموزون قیزلاری تک
دمله چایی، توک وئر گورک
آنامین دلبر گلینی
یادلارا آچما الینی
ساری سنبل بیزیم چورک
پامبیغیمیز چیچک- چیچک
هر اوزومدن بیر شیره چک
سحر- سحر آج قارینا
قوت اولسون قوللارینا
مین قازاخدا کوهلن آتا
یالمانینا یاتا- یاتا
آت قان تره باتا- باتا
گوی یایلاقلار بئلینه قالخ
کپه ز داغدان گوی گوله باخ
ای آزاد گون، آزاد انسان
دویونجا ایچ بو بهاردان
بیزیم خاللی خالچالاردان
سر چنار کولگه سینه
آلقیش گونش اولکه سینه
کونلوم گئچیر قارا باغدان
گاه بو داغدان گاه او داغدان
أخشام اوستی قوی اوزاقدان
هاوالانسین خانین سسی
قاراباغین شکسته سی
گوزل وطن معنان درین
بئشیگیسن گوزللرین
عاشق دییه ر، سرین- سرین
سن گونشین قوجاغیسان
شعر، صنعت اوجاقیسان
اولمز کونول ، اولمز اثر
نظامی لر، فضولی لر
الین قلم، سینه ن دفتر
دئه، گلسین هرنه یین واردیر
دئییلن سوز یادگاردیر
بیر دون بیزیم باکی یه باخ
ساحیللری چیراغ- چیراغ
بوروقلارین هایقیراراق
نعره چالیر بوز چوللره
ایشیقلانیر هر داغ دره
نازلادیقجا سرین کولک
ساخللره سینه گرک
بیزیم باکی، بیزیم اوره ک
ایشیقدادیر قوت سوزی
سحرلرین اولکر گوزی
گوزل وطن او گون کی سن
آل بایراقلی بیر سحردن
الهام آلدین، یاراندیم من
گولور توپراغ، گولور انسان
قوجا شرقین قاپو سو سان
نغمه لریم سرین – سرین
عاشقی یم بو گونلرین
آتامیز شانلی رهبرین
گنجلیگی سویله نیر بوردا
حیات وئرمیش بیزیم یوردا
دینله منی، گوزل وطن
بیر سوز گلیر اورگیمدن
خلقیمیزین عشقیله سن
گوله جکسن هر بیر زمان
آذربایجان، آذربایجان
صمد وورغون
