دئییرلر تاپدی آدم، یول بهشته
ایچیب سوت باده دن بیر دول بهشته
فراموش اولدو بوغدا موغدا گئتدی
ایتیردی ساغ سولون بیر یول بهشته
اوزاقدان گؤرمه میشلر تک، باخیردی
گلن حوری¬لره، زول زول بهشته
تاپیلدی بیلمیرم شیطان هایاندان
پشیمان اولدو گیرجک اول بهشته
چکیل واعظ بهشتن قاچمیشام من
منی دای وئرمه بیر ده هول بهشته
مگر زوردور جماعت گلمیرم من
اگر ده اولسا هر زاد بول بهشته
بو دونیاده، گتیر بیر آلونک وئر
او قصری ایسته میر، یوخسول بهشته
دئییرسن پولسوز احسانسیز صراط¬دان
گئچلمز بیر عؤمور بی پول بهشته
سنین قیل کؤرپووه، یوخ¬دور نیازی
اوتوبان تک چکیبلر یول بهشته
گتیر بیر آدرس وئر، نذرین آلدین
گئدیر راننده¬ی ولول بهشته
خراب اولسان دا، یولدا واردی امداد
ائدر مداح سنی، بوکسول بهشته
نه اوردا بازرس وار، نه اماکن
نه قدری گؤیلون ایستیر، دول بهشته
گؤز ایشلیر حوری دیر، ایرانلی قارداش
تامام قیزدیر، تاپیلماز دول بهشته
خبر یوخ اوردا مانتو روسری دن
گزیرلر، بی حجاب، شول شول بهشته
بیر عؤمری تابلانیبسان، آغلاییبسان
بیر آز دا قسمت اولسا گول بهشته
اوستاد احمد صادقی نافیذ
ای خسته قوش اواره گزیرسن بو دیاری
زنداندی قفسدی چمنی،باغی،باهاری
گوزله اوزووی اوچی دی هریانی بو یوردون
قوزغون کیمی دورت گوزلو گزیر کورپه شکاری
فرصت دالی سینجا گزیر ال یئری تاپسا
ویران قویاجاقیوردونی ای کوینکی ساری
تیک اوز یووانی قویما سنه ال تاپا اوچی
سن بو یووانئن صاحیبی سن،قان یئنه باری
جهد ائیله کی،جان قورتاراسان اوچی الیندن
دوشسن تورا،فریاد ائلمه،چک بو فشاری
گولشنده کی یوخ ذوق وصفا ای ساری
کوینک قاچ قاچ بو یئرین زهرلی دیر دارو نداری
دیللنسن اگر،اوچی ائده ر قانئنا غلتان
اوچسان آ یازئق!تیر جفا قلبینی یاری
مین فئرتانا قالخئب،دوگه جک،باشئنا طوفان
هر کیمده اولا،داغ کیمی دونیادا ووقاری
گلسه نه قده ر دردو بلا ،داغ کیمی دور باخ
ایدین دی بو سوز"توستو گئده ر گوچکه ساری"
ایستر سنی صیاد اوزونه رام ائده امما
اویغودا گوره ر،اج تویوق البتده کی داری
بو یاخشی مثل دیر کی بیزیم ائلده دئمیشلر:
بیر باخ اشاغا ،باخما اوزونده ن ده یوخاری
غم غصه کیچیک قلبینی گر دوگسه سئخئلما
بو گونده کئچر،اخیری،غملرده قوتاری
اوندا کی چئخارگون،یاییلار عالمه بیرده ن
اوندا کی قارادان یئری ،صبح اولجاق اغاری
داغی-داشی اسوده خیالیله گزه رسن
گولشنده نه شاختا گوره سن،داغدا نه قاری
ظولمون ائوی ویران اولو ،ظالیم دوشه ر الدن
قان دورماز اگر کسسه پئچاق قئرسا داماری
بختین قاپوسی ایندی قئفئلانسا دارئخما!
هر بیر قئفئلئن واردی طبیعتده اچاری
اوز جانوویلن اویناما بو عرصه ده "شیدا"
لیلاج دغلبازیله قئزدئر ما قوماری
یحیی شیدا
سن سیز له میشم
نئچه گوندوز گئجه دیر من سنه سن سیزله میشم
بیر اوشاق تک آناسین گؤرمه یه سن سیز له میشم
ائله اود ووردو بو قان باغریما هیجران الووون
سو تکین آتشی سؤندورمه یه سن سیز له میشم
سئوگی دیر کؤنلومو پروانه کیمی یاندیران اود
وورغونام شمع وجوده نئجه سن سیز له میشم
عشقه بیگانه اولان هاردا بیلر سئوگی ندیر
من شیرین عشقینه فرهاد کیمی سن سیز له میشم
کوی عشقینده گزر کن تاپارام سیمایین
بیر بوداق کؤلگه سی تک من سنه سن سیز له میشم
گول عوذارین ائله مجنون ائله دی سالدی چؤله
لیلی سن سن دلی من باخ نئجه سن سیز له میشم
سن اوزاق دوشمه آماندی دؤزه بیلمم فراغا
تونگ ده کؤرپه بالیق تک سویا سن سیز له میشم
سون باهار گلسه سولار گوللو چمن لی مئشه لر
گول کیمی بولبوله خاطیر نئجه سن سیز له میشم
گئجه گوندوز دؤزرم تا کی گؤرم بیرده سنی
پارلاق اولدوز سایاراق آی کیمی سن سیز له میشم
موتلویام واردی بو دونیادا فقط بیرجه جانیم
قوربانین ائتمه یه باخ گؤر نئجه سن سیز له میشم
اسفندیار سپهری
عشقین آخیر باده سینن مست و مدهوش اولموشام...
کفلنیب من هرگجه عشق ایچمیشم مست اولموشام...
من اوزوم ساقی اولوب می ورمیشم دم توتموشام...
عشقینن سونسوز قوماردا تکجه من غم اوتموشام...
سن بونی فیکر ایلمه من هر گجه تک قالمشام....
چون سنین ساینده هر دم غمله همدم اولموشام...
سن خیال اتدین سنین عشقینده من سوستالمشام؟؟؟
سن خیال سهو ادیبسن من بو جاننان دویموشام...
سن کی گتدین، گورمدین من چوخ خیاللار قورموشام..
گت ولی عیب ایلمز من اوز سوزومده دورموشام ....
مهردادن دونیاسنی ویران ادن دوشمن دییر...
من گوروب دوستدان خیانت دوشمنه دوست اولموشام...
چوخلی سوزلر وار اورکده یازماغا گلمیر قلم...
سون سوزوم اولسون بوکی من عشقه ثابیت دورموشام...
اورمو گولو نه حالداسان؟
دالغالارین گؤزه دیمیر
اورمو گؤلو نه حالداسان؟
شَپه لنیب اوزه دیمیر
اورمو گؤلو نه حالداسان؟
نه باتبسان غمه؟ اویان
عمرو بادا وئرمه دایان
سزیلتیوی کیمدی سایان..؟
اورمو گؤلو نه حالداسان؟
من جان اولسام،سن قانم سان
گؤزل-گؤیچک نیگاریم سان
باشدا تاجیم،ویگاریم سان
اورمو گؤلو نه حالداسان؟
سن جان اوسته،من یارالی
سن سن کؤنلومون مارالی
قالمیشام سنن آرالی
اورمو گؤلو نه حالداسان؟
ائل وارلیقین ندن ساتیر..؟
هئی سنی اوزاغا آتیر
گونو گوندن سَسین باتیر
اورمو گؤلو نه حالداسان؟
هر گون کؤنول داغلییرام
قلبیم یانیر،چاغلییرام
سن دولاسان،آغلییرام
اورمو گؤلو نه حالداسان؟
تبریز باخیر سنه ساری
هئی اوجالیر آهو-زاری
ایتیب- باتیب داغین قاری
اورمو گؤلو نه حالداسان؟
«ایزه وانلی دومان»اوْیان
حقیقتی کیمدی سایان..؟
سنده بیر سوْر،قانون قویان
اورمو گؤلو نه حالداسان؟
«ایزه وانلی دومان»
