من ترک شراب لب یار ایلدیم اولدی/

زهر غم هیجریله مدار ایلدیم اولدی

هئچ کیمسه ئوزون خار و ذلیل ایستمز امما/

من ئوز،ئوزومی دهرده خوار ایلدیم اولدی



صراف تبریزی

او فریبا گؤزه لیم هر بیر ایشه قادیرایمیش
ایندی بیلدیم او اؤزو بیر بالاجا ساحرایمیش

هارا گئتدیم منیله شام و سحر یولداش ایدی
هاردا قالدیم ، باشیم اوسته دئیه سن حاضرایمیش

هامی اسراریمه پیس - یاخشی بوتون آگاه ایدی
وار یقینیم کی ، منیم ایشلریمه ناظرایمیش

گرچه ممکن دی بیری چوخلو ایشه ماهر اولا
آمما هر ایشده نگاریم هامیدان ماهرایمیش

دونیا اهلینده اینان باطن زیبا یوخ ایدی
بو جماعت ده فقط جلوه له نن ظاهرایمیش

یاخشی اللاهیمه بیر عؤمر توکّل ائله دیم
طول عؤمرومده فقط بیر او منه ناصرایمیش

محمود قاضی زاده خسرو شاهی
( ا وزون آرزولار)

قیزیل گول

آچیب دیر بوردا بیر گؤیچک قیریل گول
اونو گؤرجک گلیب افغانه بولبول

اؤزو گولدور، اوزو گول دور، سؤزو گول
اَییب دیر باش اونا نسرین و سونبول

دوداق قرمیز، اوزو آغ ، زولفو قاره
باخان دویماز، نقدر ائیلر نظاره

کمانی قاشلار، آغزی عین پوسته
هلاله بنزه یر چیخسا دام اوسته

پریسا ، دلربا، خوش قد و منظر
او خوش قامت، او خوش بوی، سروه بنزر

پاریلدار اود او قاره گؤزلرینده
یاغار شکر او شیرین سؤزلرینده

او بیر جوت گؤز انو جیران ائدیب دیر
من بیر عؤمردور حیران ائدیب دیر

گولر چوخ عشوه لی، گاهدان بیر آغلار
بو غمی قلبیمی هر دمده داغلار

آیاقدان تا باشا هر بیرزادی دوز
نه کول تؤکسون باشا بیچاره انسوز

دئدی:«بیر عیب اولار هر بیر گؤزل ده
اگر چه المویا مثلی مَحَل ده»

بونون عیبی بودرکی رحمی یوخدو
اورک ده مهری آزدیر، کینی چوخدور


محمود قاضی زاده خسرو شاهی
( ا وزون آرزولار)

منده سیغار ایکی جهان، من بو جهانه سیغمازام گوهر لا مکان منم ، کون و مکانه سیغمازام
عرشیله فرش و کاف و نون ،منده بولوندی جمله چون کس سؤزونو وی عبثم اول شرح بیانه سیغمازام
کون و مکان دیر آیتیم ،ذاتی دورور بیدایتیم سن بو نیشانلا بیل منی، بیلکی نشانه سیغمازام
کیمسه گمان و ظن ایله ،اولمادی حقّیله بیلیش حقی بیلین بیلیرکی من ظن و گمانه سیغمازام
صورته باخ و معنی نی ،صورت ایچینده تا نی کیم جسمیله جان منم ولی جسمیله جانه سیغمازام
هم صدفم ،هم اینجییم ،حشر و صراط و اسینجیم بونجا قماش و رخت ایله،من بو دوکانه سیغمازام
جانیله هم جهان منم ، دهریله هم زمان منم گؤر بو لطیفه ای کی من دهر و زمانه سیغمازام
گرچه موحیطی اعظم ،آدیم آدمدیر آدمم توریله کن فکان منم ، من بو مکانه سیغمازام
انجوم ایله فلک منم ،وحی ایلع هم ملَک منم چک دیلینیوو عبثم اول من بو لیسانه سیغمازام
ذره منم ،گونش منم ، چاریله پنج و شش منم صورتی گؤر بیان ایله چونکی بیانه سیغمازام
ذات ائله یم صیفات ائله،گول شکرم نبات ائله قدر ائله یم برات ائله،بسته دهانه سیغمازام
شهد ایله هم شکر منم ، شمس منم ، قمر منم روحی روان باغیشلارام روحی روانه سیغمازام
ناره یانان شجر منم ، چرخه چیخان حجر منم گؤر بو اودون زبانه سین من بو زبانه سیغمازام
تیر منم کمان منم،پیر منم، جوان منم دولتی جاویدان منم،آئینه دانه سیغمازام

گر چه بو گون نسیمی یم ،هاشمی یم ، قریشی یم مندن اولدور آیتیم ،آینه شانه سیغمازام

دریای محیط جوشه گلدی کونیله مکان خروشه گلدی
سرّی ازل اولدی آشکارا عارف نئجه ایلسین مدارا
هر ذره گونشدن اولدی ظاهر توپراغه سجود قیلدی طاهر
نقاش بیلیندی نقش ایچینده لعل اولدی روان بدخش ایچینده
آجی سو شراب کوثر اولدی هر زهر نبات شکَّر اولدی
کلی یئر وگؤی حق اولدی مطلق سؤیلردف و چنگ و نی انا الحق
معشوقیله عاشق اولدی بیر ذات محو اولدی وجود نفی و اثبات
هر قطره محیط اعظم اولدی هر ذره مسیح مریم اولدی
داش و کسک اولدی ورد نسرین فرهاد ایله خسرو اولدی شیرین
تریاک مزاجی دوتدی آغو لؤ لؤ مدور اولدی دارو
مسجود ایله ساجد اولدی واحد مسجود حقیقی اولدی ساجد
ایمانیله کفر بیر شی اولدی تاتلی ایله آجی بیر می اولدی 

سؤیلر بو کیتابتی نسیمی من سر کلام حق نعیمی
الحق بو نسیمی آیتینده ن گئل اوخو بوگون نیهایتینده ن
الفاظ نسیمی گؤر نه جاندور دریای موحیط،بحر کان دور
بو بحره دالیب دور نسیمی یعنی کی ندیر زر ایله سیمی

                نسیمی