آی ائلیم گوجلی سئلیم دور ایاقا،
قویما دیلون تولکی آپارسین،
دور دانیش قویما یوبانسین،
آز قالیبدیر آنا قارنیندا.اوشاق لار سنی دان سین،
آنا گل:سنده آنون تک بالاووی تورکی دانیشدیر،
بویونا اوخشا اوجالسین
اوخو قوی خان چوبانین روحی دیریلسین،
سارانی باغرینا باسسین،
اوخی قوی ساحیر اویانسین،
سؤیله اؤز بال دیلیوی ایسته میین لر گؤزی چیخسین،
آی ائلیم یاتما آماندی
دوشمانین گؤزلری باخسوون دولی قاندی،
همده کی چوخلی یاماندی
ایسته ییر اؤز الیمیزله
کسه دیبدن بو آغاجی
اؤزونی بال بیلیری .بیزلری آجی
بیزی کافیر اؤزون حاجی
حاققیمیزدی اوخویاق همده یازاق اؤز دیلیمیزده
چالیشاق حاققیمز اوسته،
یوخسا من گؤرمه میشم کیمسه نین حاققین
وئره لر اؤز قاپیسیندا
هامیسین هئچ یاریسندا

حیدر بابا، گلدیم سنی یوخلیام،
بیرده یاتام ، قوجاغوندا یوخلیام،
عمری قووام، بلکه بوردا حاخلیام،
اوشاقلیغا دیه م ، بیزه گلسن بیر!
آیدین گونلر، آغلاراوزه گولسن بیر.
(78)
حیدربابا، چکدون منی گتیردون،
یوردوموز-یووا میزا ایئتردون،
یوسفوی اوشاقیکن ایتیردون،
قوجا یعقوب، ایتمیشسده، تاپوبسان
قووالیوب، قورد آغریندان قاپوبسان!
(79)
بوردا دوشن کروان چاتوب، کو چوبدی،
آیریلیغین شربتینی ایچوبدی،
عمرموزون کوچی بوردان کوچوبدی،
کوچوب گئدوب، گئدرگلمز یوللارا،
توزی قونوب بوداشلارا،کوللارا!
(80)
بوردا شیرین خاطره لر یاتوبلار،
داشلاریان باشی-باشا چاتوبلار،
آشنالیغین داشین بیردن آتوبلار،
من باخاندا، قاوزانیللار، باخیللار،
بیرده یاتوب، یاندیریللار، یاخیللار.
(81)
گئدنلرین یری بوردا گورونور،
(خانم ننه م ) آغ کفنین بورونور،
دالیمجادور، هاراگئدم سورونور،
بالا گلدون، نیه بیله گژ گلدون،
صبریم سنن گولشدی، سن گوژ گلدون.
(82)
قبیله میز بوردا قوروب اوجاغی،
ایندی اولموش قورد قوشلارین یاتاغی،
گون باتاندا، سونر بوتون چراغی،
و بلدة لیس لها انیس،
الاالیعافیر و الا العیس ،
(83)
روزگارین دگیرمانی فیر لانیر،
مخلوق اونون دیشلرینه توللانیر،
باخ که، بشر گنه نئجه آللانیر:
همیشه لیک شادلیق اومور ئوزونه،
قبری گورور، توزقوندورمور اوزونه.
(84)
کهنه لرین سور-سوموگی دار تیلوب،
قورتولانین چول-چوخاسی ییر تیلوب،
(ملا ابراهیم) لاپ ارییوب، قورتولوب،
(شیخ الاسلام) ،سهمان قالیب، قیوراخدی،
نوروزعلی، قاچاق گچیب، قوچاقدی!
(85)
آهیللارون، یتمیش کفن چورودوب،
جاهیللاری دنیا غمی کیریدوب،
قیز گلین لر، ات-جانلارین اریدوب،
(رخشنده نین) نوه دوتور الینی،
(ننه قیزین) کوره کنی- گلینی.
(86)
چوخ شکروار،گنه گلدوخ گوروشدوخ،
ایتنلردن، بیتنلردن سوروشدوخ ،
کوسموشدوخ دا، آللاه قویسا، باریشدوخ،
بیرده گوروش قسمت اولا، اولمایا،
عمرلرده فرصت اولا، اولمایا.
(87)
بوداملاردا چوخلی جیزیخ آتمیشام،
اوشاقلارین آشیقلارین اوتموشام،
قورقوشوملی سققه آلیب- ساتمیشام،
اوشاق نئجه هچ زادینان شاد اولار!
ایندی بیزیم غمی دوتمور دنیالار.
(88)
بو طوله ده ساری  اینک دوغاردی،
خانم ننه م اینکلری ساغاردی،
آنا اییسی دام – دوواردان یاغاردی،
من بزووی قوجاخلاردیمریا، قاچماسین،
دییه ردی:باخ، بایدا دولسون داشماسین.
(89)
بوردا خیال میدانلاری گنیش دی،
داغلار-داشلار بوتون مننن تانیشدی،
گورجک منی، حیدبابا دانیشدی:
بونه سسدی،سن عالمه سالوبسان!
گل بیر گورک ئوزون هاردا قالوبسان؟
(90)
کجاویله بو چایدان چوخ گچمیشیک
بو چشمه دن سرین سولار ایچمیشیک،
بو یونجالیقلاردا اکیپ بیچمیشیک،
چپیشلری قیدیخلیان گونلریم؛
چیپش کیمی اویناخلیان گونلریم!
(91)
خانم ننه م ناخوش اولان ایلیدی،
قیش وارایکن کولک ایدی،یئل  ایدی،
قیش داچیخدی، یاغیشیدی، سئلیدی،
یوک-یاپینی هی چاتیردوق که گئداخ!
سئل کوشگورور، مجبور اولدوخ قییداخ.
(92)
نیسان دوشدی،بیزده دوشدوخ یاغیشا،
هی دییردوخ، بلکه یاغیش ییغیشا،
کیم باشاریر سئللرینن بوغوشا؟!
(بالا کیشی) ، فایتونچی میز گلمیشدی!
(اما میه )ذقهوه سینده قالمیششدی.
(93)
بو خرمنده«آردان خیر» اوینار دوخ،
جومالاشیب،قاریشقاتک قایناردوخ،
یواش-یواش باغچالارا آغناردوخ،
آغاشلاردان چلینک آغاج کسردوخ،
قوروقچونون قورخوسسیندان اسردوخ!
(94)
بو باغچادا آش تره سی اکردیک،
هی سو آچیپ، کردییه گوزتیکردیک،
چیخماق همین دریب، آشا توکردیک.
فینتلیش لر قاشیقلاردان آسلانی!
یاغلی دئسه م ، قوری آغزون ایسلانی!
(95)
مکتب قالیر، اوشاقلار درس آلیللار،
هی یازیللار، هی پوزیللار، یالیللار!
( ملا ابراهیم)، ئوزی-ائوی قالیللار،
اما بیزیم یولداشلاردان قالان یوخ!
بونلاردان بیر بیزی یاداسالان یوخ!
(96)
بو مکتبده، شعرین شهدین دادمیشام،
آخوندون آغزیندان قاپوب، اودموشام،
گاهدان دابیر،  آخوندی آللاتمیشام،
باشیم آغریردییوب،قاچیپ گتمیشم!
باغچالاردا گئدیب، گوزدن ایتمیشم!
(97)
آزاد اولاندا، مکتبدن چیخاردیق،
هجوملا بیر- بیریمیزی سیخاردیق،
یولدا هرنه گلدی، ووروبییخاردیق،
اوشاق دئمه، ایپین قیرمیش دانادئه!
بیردانا دا دئمه، اوتوزا دانا دئه!
(98)
دئدیم: بالام،(اوممدسن) نولوبدی؟
معلوم اولان، طفیل بالا ئولوبدی؟
نه وار، نه وار، بورنوندان قان گلوبدی،
بیر یئل اسیر، باخیرسان(ممدسن)یوخ،
بوکتده بیر بورون قانی کسه ن یوخ؟
(99)
(ملک نیاز)، ایتگین گئدیب یوخ اولوب.
(میراصلان خان)، سکته ائدیب ییخلوب.
هرکس سینوب بیردمکده سیخیلوب،
چورک غمی چیخوب خلقین آیینا!
هره قالیب ئوز جاننین هایینا!
(100)
کتدی یازیق چراغ تاپمیر یاندیرا،
گوروم سیزون برقوز قالسین آندیرا،
کیم بوسوزی اربابلارا قاندیرا،
نه دور آخر بو ملتین گناهی،
توتسون، گوروم، سیزی مظلوملار آهی!
(101)

 ((ای گول))
*****
ای گول نه روادور کی سنین عومرون آز اولسون
باغ   باغچالارین  گؤهری   بیردن  بئله سؤلسون
*****
سنسیز  چمنین   زینتی  اولماز   بیلیرم  من
گولسوز چمنه نغمه لی بولبول نجه قونسون
*****
عطرون  إلییب  مست و خورامان بیزی هرگون
انصاف دان اوزاقدیر سنی باغدا بیری یولسون
*****
پروانه      گزر     باغچالاری      گوللره     خاطیر
عاشیق دی سنه چون کی بیلیر باغچادا بول سون
*****
بولبول سنه  عاشیقدی  یقیناً  کی  بیلیرسن
گل قویما بو عاشیق سنه خاطر بئله اؤلسون
*****
گول اولماسا هچ واقت چمنین ارزیشی اولماز
قویما  کی چمن ارزیشی سنلن  یاری بؤلسون
*****
قوی  پوسته  دوداغلار  آچیلا  باغلار ایچینده
تا  عشقینه   عاشیقلر،  ائییندن  باغا  دولسون
*****
سن جان وئریسن داغلارا چون جانلی  بئزک سن
گوج وئر بو قوجا  داغلارا قویما  کی  یؤرولسون
*****
ای گول بو«آمانسیز» داغینین زیوری سن سن
آچ غونچه لرین سئر بو داغا تا اوزو  گولسون
*****
،،آمانسیز،،  حسین شاهمرادی  05-11-94

بیر میلتدی، بیر تورپاقدی، بیر وطن،
او تای نه دیر، بو تای نه دیر ایلاهی؟!
هر طرفه پای وئریبلر حسرتی،
او پای نه دیر، بو پای نه دیر ایلاهی؟!
عینی باغدی، عینی باغچا، عینی بار،
عینی سازدی، عینی کامان، عینی تار.
 اورتالیقدا دمیر حاصار، لای دیوار،
او لای نه دیر، بو لای نه دیر ایلاهی؟!
اوستوموزده ن آجی یئل تک اسن کیم؟
کسیلن بیز، کسدیرن کیم، کسن کیم؟
آمان قارداش، دئ، من کیمه م، دئ سن کیم؟
او های نه دیر، بو های نه دیر، ایلا هی؟!
 میلته باخ، دمیر توردان بویلانیر،
دیری ائودن، اؤلو گوردان بویلانیر،
یئددی بوردان، یئمیش اوردان بویلانیر،
او سای نه دیر، بو سای نه دیر، ایلاهی؟!
هانسی باشدی، هانسی بدن بیلینمز،
 پارالانسا وارمی وطن، بیلینمز.
اوردا اؤلن، بوردا ایتن بیلینمز،
او وای نه دیر، بو وای نه دیر، ایلاهی؟!
بای اولماسین، قاری دوشمن بای اولدو،
چوخ عومورلر نیسگیللره پای اولدو.
ایکی یاندا گؤز یاشیمیز چای اولدو،
او چای نه دیر، بو چای نه دیر، ایلاهی؟!
 بو صحبتی اورتالیغا کیم سالیب؟
بو حسرتی اورتالیغا کیم سالیب؟
 بو ذلتی اورتالیغا کیم سالیب؟
 او تای نه دیر، بو تای نه دیر، ایلاهی؟!
او درد نه دیر، بو درد نه دیر، ایلاهی؟!

یاغما یاغـیش                                        

آی یاغیش یاغما نولار, پوزما منیم ایلقاریمى                                   

منی اینجیتمه بو آخشامدا,قاچیرتما یاریمی

یاغیسان یاغ, ائله یاغ کی, چیله نم- نم نولار                                 

سئله چونده رمه داها, ییخما منیم پرگاریمی

مین فیریلداق وئره ره ک , یاری چیخارتدیم ائشیگه                          

بئله شاققیلتی سالیب, قورخودوسان دیلداریمی

هله شاققیلتی جهننم , نیه بس اود شاخیسان؟                             

ائلدیریم دای نه دی ؟ ویران ائلیسن گولزاریمی

 بو شیریلتی کی سالیبسان اوخویور نودانلار                                   

باخیرام سو باساجاق , دولدورا هر نه واریمی

پاه آتوننان قارا باختیم, نه گورولدور بو هاوا!                                 

قورخورام لاپ اوزه بو قورخولو چاغ افکاریمى

شانسیما آغ قاتالار میندی بولود اوسته بولود                                 

دولویا چونده ره جک دیر , یئره سورته باریمی

گون آرا قاشدا قارالدی , گئجه اولدی آللاه                                     

چاخماقین چاخ باری  قویما, قیریرام افساریمی

من نه یاریله گوروش نه , سنه قوربان تانریم                                

پالچیقا سوخما باری, عارییه کت شالواریمی