او تاییدا قالیبدی


ازل گوندن اوره ییمین یاریسی .
خان آرازین اوتاییندا قالیبدی.
هونریمین موسیقیمین تانریسی.
خان آرازین او تاییتدا قالیبدی.

گولشه نیمین بنوشه سی لالاسی.
آنا دوغما وطنیمین بالاسی.
صداقتین محببتین قالاسی.
خان آرازین او تاییندا قالیبدی.

دده قورقود یادیگاری قوپوزو.
علسگرین تئللی سازی حاق سءوزو.
آل گونشی نورلو آیی اولدوزو.
خان آرازین او تاییندا قالیبدی.

حیاتیمین اوره ییمین نیازی.
عالیم موغاماتی گءوزل آوازی.
عدالت بایراقی عدالت سازی.
خان آرازین او تاییندا قالیبدی.

جئیران کیمین آزربایجان گءوزلی.
صابر آدلی شاعیر سءوزو مزه لی.
وورغونون قوشماسی واحد غزلی.
خان آرازین او تاییندا قالیبدی.

هابیل علی اوفون گءوزل کامانی.
بختیار تک حاققی بیلیب قانانی.
بهمن کیمین ائل اودونا یانانی.
خان آرازین او تاییندا قالیبدی.

کءونول کیمین اوخویانی بیله نی.
زلیم خان تک آغلار گءوزو سیله نی.
ائل قمینه آغلایانی اءوله نی.
خان آرازین اوتاییندا قالیبدی.

جاوانشیربن جاودانین امه گی.
بابکیمین قانا باتمیش بیله گی.
آیریلمازین بوتون آرزی دیله گی.
خان آرازین او تاییندا قالیبدی.


آیریلماز ??