سنه دوغری دئیه ن کیم دیر؟
(یالان دنیا یالان دنیا)
سنی فرزانه لر آتدی
قاپیب دیوانه لر توتدی
کیمی آلدی کیمی ساتدی
ساتان دنیا آلان دنیا
آتی ازل داغا سالدیق
یورلدوقجا دالی قالدیق
آتی ساتدیق اولاغ آلدیق
یهراولدی پالان دنیا
بیری آینا بیری پاس دیر
بیری آیدین بیری کاس دیر
گئجه طوی دیر سحر یاس دیر
گول آچدیقدا سولان دنیا
ایگیت لرین باشین یئیه ن
قوجالار بوز باشین یئیه ن
قبیر لرین داشین یئیه ن
ئوزی یئنه قالان دنیا
نه قاندین کیم گول اکن دیر؟
کیم قیلیج تک قان توکن دیر؟
تیمور هله کوره کن دیر
چنگیز جانین آلان دنیا
یامان قورقو ییغیلایدین
طوفانلار دا بوغلایدین
نولیدی بیر داغیلایدین
بیزی درده سالان دنیا
چاتیب سندن کوچن کئچدی
اجل جامین ایچه ن کئچدی
اولان اولدی کئچن کئچدی
نه ایستیرسن اولان دنیا
بوغلایدین دوغان یئرده
دوغوب خلقی بوغان یئرده
اوغول نعشین اوغان یئرده
آنا زولفون یولان دنیا
قازانیب هی تالانیب سان
قالانیب هی جالانیب سان
ازلدن چالخالانیب سان
یئنه ده چالخالان دنیا
ننه قارنی ایلک بئشیگون
قبرستانلیق سون دئیشگون
مه ایچه رین نه ائشیگون
قارانلیق بیر دالان دنیا
سنی بایقوشلار آلقشلار
ده لی ویرانه نی خوشلار
دولان عقله سنی بوشلار
ایچی بوشلار دولان دنیا
سنه قارونلار آللاندی
قیزیلدان تللی قالاندی
باتیب ظلماته قویلاندی
اولوب تللی تالان دنیا
اوجاق ایکن سونونموشسن
چاناق ایکن چونونموشسن
نه پیس قاری ننه ایمش سن
ناغیل! یالان! پالان دنیا
استاد شهریار..??????
