آیریلدیم
منه مجنون دئمه جانا ، کی من لیلا دان آیریلدیم
بئلی اینجه قاشی خنجر ، گؤزی شهلا دان آیریلدیم
گوزل نازلی سؤزی سازلی ، او آوازلی نیگاریم دان
شیرین دیللی ساچی تئللی ، مَلَک سیما دان آیریلدیم
دویونجا گؤرمه دیم هئچ من ، او گول روخساری آی آللاه
اینانمیر بو کونول کی بولبول شیدا دان آیریلدیم
گؤزومدن بیر آراز آخدی ، اُوت اولدی سینه می یاخدی
او گوندن کی دلی لر تک گول رعنا دان آیریلدیم
اولر ماهی دنیزدن گر بش اون دیقه اوزاق قالسا
نئجه دؤزسون بالیق کونلوم ، کی من دریا دان آیریلدیم
منیم بیردانه دونیام وار ، اودا سؤزسوز فقط سنسن
من ایندی بیر اولو جیسمم ، آخی دونیا دان آیریلدیم
شاعیر : وحید شکرزاده
-
