عشق الیندن یاندی جانیم یا علی سندن مدد من فقیرم،بینوایم،یا علی سندن مدد
سن منه لطف و کرمدن دردیمه بیر چاره قیل شاه سنسن، من گدایم،یا علی سندن مدد
حق تعالی ئوز نوروندان چون یاراتدی شاهینی قدرت سر خداسان ، یا علی سندن مدد
هم خدیجه فاطمه خیر النسا بنت النبی معدن در حقیقت یا علی سندن مدد
بندة خلق حسن اولدوم ازلدن تا ابد نور چشم مصطفی سان یا علی سندن مدد
هر رجب آییندا گؤردوم نئچه معجز گؤسترر شاه حسینین صندقیندن یا علی سندن مدد
جمله اولادینی سندن ظهور اولدی امام آدی زین العابدین دور یا علی سندن مدد
باقر و صادق یولوندا اوینادارام باشیمی موسی کاظم عنایت یا علی سندن مدد
بیر طواف مرقد شاه خراسان ایله کی یئتمیش ایکی حج اکبر یا علی سندن مدد
اول امام عسگری یعنی حسین بن علی قره العین نبی سن یا علی سندن مدد
هم تقی با نقی دور وارث دین نبی دولت آل عباسان یا علی سندن مدد
یا محمد مهدی صاحب زمان ایله ظهور عالمی کفار دوتدی یا علی سندن مدد
زاهیدین زهدینه یاندیم آتشی هجراندا من صاف اولدوق کانه یئتدیک یا علی سندن مدد
احمد مختار سنسن ساقی کوثر علی یئددی کشور سروریسن یا علی سندن مدد
ای نسیمی دل شکسته حقدن ایسترسن نجات جرعةتوحید میندن یا علی سندن مدد
نسیمی
اونداکی اولاد وطن خام ایدی آخ نئجه کئفچکمه لی ایام ایدی
اوز حق مشروعونی بیلمزدیلر چهره حریته گولمزدیلر
گؤزلرینی بیر کره آچمازدیلر غزته یه،ژورناله اگیلمزدیلر
دائم اشیتدیکلری اوهام ایدی آخ نئجه کئفچکمه لی ایام ایدی
اؤلکه ده بونجا یوخیدی عیب جو نیلردیسه آنجاق گؤرونوردو نکو
خلقده دیداریمیزه آرزو بیزده واریدی نه گؤزه ل آبرو
حؤرمتیمیز واجب اسلام ایدی آخ نئجه کئفچکمه لی ایام ایدی
ملته چاتدیقجا غم عیاش ایدیک حاکمه یار،آمره قارداش ایدیک
قبله طاعتده کی اوباش ایدیک هاردا آش اولسایدی اورا باش ایدیک
هرگئجه هر گونبزه بایرامیدی آخ نئجه کئفچکمه لی ایام ایدی
گرچه ریاایدی بوتون کاریمیز کاریله برعکسیدی کرداریمیز
لیک همان واریدی مقداریمیز حجتیدی هر کسه گفتاریمیز
خلقین ایشی بیزلره اکرام ایدی آخ نئجه کئفچکمه لی ایام ایدی
عیبیمیزی چولغالامیشدی ابا هر نه گلیردی بوشالیردی قابا
کیم نه قانیردی نه دی زهد وریا نا خوشه خاک دریمیزده ن شفا
صومعه میز کعبه احرام ایدی آخ نئجه کئفچکمه لی ایام ایدی
بیزلریدیک خلقین ایناندیقلاری پیر هدایت دییه قاندیقلاری
نور گؤرور لردی قارانلیقلاری بیزده ایدی جمله قازاندیقلاری
کیم بیزه پول وئرمه سه بد نام ایدی آخ نئجه کئف چکمه لی ایام ایدی
ایندی آداملار دییه سن جین دیلر جن ندی شیطان کیمی بی دیندیلر
لاپ بیزی اوسارلادیلار میندیلر آی گئچن ایام اولاسان ایندیلر
اونداکی اولاد وطن خام ایدی آخ نئجه کئفچکمه لی ایام ایدی
میرزا علی اکبر صابر
ای حسینه آغلایانلار آغلایین اوز حالوزا -- ایندی آغلیر کربلا شاهی سیزین احوالوزا
رادمردان خدا اولمز همیشه زنده دیر -- سیز اولرسیز باخمایین بوجارو بو جنجالوزا
امت بی غیرتی نئینیر امام تشنه لب -- احتیاجی یوخ سیزین بیر قطره اشک آلوزا
آغلاماق وئرمه ز نتیجه عزت دین اولماسا -- یا گولون یا آغلایین یا کول یاخین سققالوزا
شمردن آرتیق حسینه سیز اذیت ائیله دیز -- ای خلاف شرع ائدنلر بیر باخین اعمالوزا
شمر بیر دفعه حسینی اولدوروب، مین دفعه سیز -- اولدوره رسیز گر دوشه ایندی سیزین چنگالوزا
سوزلریز، غیبتدی، بهتاندی، یالاندی افترا -- نه وئره ر آللاه سیزین بو خشگه قیل و قالوزا
بیر بئله دادوفغان ائتدیز حسینه آغلادیز -- ای منافقلر نه آلدیز باغلادیز دسمالوزا
نور چشم مصطفی محبوب رب العالمین -- دوز مسلمانی سئوه ر آند اولسون ایستیقلالوزا
خامس آل عبانین بیلمه دیز مقصودینی -- ایسته دی بلکه وئره رونق سیزین اجلالوزا
شرقدن غربه گره ک سیز اولایدیز حکمران -- لیک سیز آماده سیز ایندی اوز اضمحلالوزا
پاکدل اینسان سیزی گورسه یقین گمراه اولار -- کیم سیزی ناپاک ائدیب لعنت گله غسالوزا
خلقی شیطان تولایاندا تولوسوز شیطانی سیز -- مات و حیران قالمیشام بو شیوه ی اغفالوزا
یا گلین بو درگه سلطانه سیز اصلاح اولون -- یا گلین تابع اولون بیر دفعه اوز دجالوزا
اهل قرآن سیز اگر، قرآنی ایله رفتار ائدین -- ناطق قرآن سیزین باخسین گوزل اعمالوزا
زیر بار ظلمته او عالمده بیر آن گئتمه دی -- سیز ولی بیر عمر آلدیز بار ذلت دالوزا
لعنت پروردگار اولسون گوروم صبح و مسا -- پی، پارافیندن قئییرمه یاغ ساتان بققالوزا
وار بیر عده حسینچی پاکدامن بی ریا -- نه سیزه بنزه ر نه سیزین امثالوزا
من سیزه آللاهدن هر وقت توفیق ایسته ره م -- سیزده توفیق ایسته یین((حداد)) تک تقالوزا
حداد
روزی گذشت پادشهی از گذرگهی فریاد شوق از سر هر کوی و بام خاست
.............
.............
........
.........
.........
شاه و یئتیم اوشاق*
بیر کوچه‌دن کئچیردی جلالیله شهریار
های – کوی اوجالدی، اولدو او گون شنلیک آشکار
وئردی سوال، داغلی یئتیم اؤز هاماشینا
بو گؤز قاماشدیران نه‌دی شاهین تاجیندا وار؟
وئردی جواب: بیلمیرم، آنجاق ائشیتمیشم
ارزشلی اینجی‌دیر باشا قویموش او بختیار
گئتدی قاباغه بیر قاری عورت، دئدی بئله:
گؤز یاشی‌دیر! اورک قانی‌دیر، اولسان هوشیار
بو قورد کی، بیزلره تانیش اولموش بیر عؤموردور
دایم فلاکته سورونو ائیله‌ییب دوچار
عارف کی ییغدی ثروت و دولت "حرامی" دیر
بیر شاها کی، مولک آل – وئر ائده ائتمه اعتبار
دقتله گؤر یئتیم‌لرین قانلی گؤز یاشین
بو گوهرین پاریلداماغین آنلا کم عیار
"پروین" یالان دئینلره دوز سؤز نه بهره‌سی
کیمدیرکی دوز دانیشماغینا ائتسین افتخار؟
پروین اعتصامی
شعری در مورد یکی از اسطوره های آذربایجان (سارای)
آنا یوردون قیزی
سارا بیر آیدی بیزیم اللره آیسز گجه لر ----------------- بیر اوجا سسدی قولاق وئر اونا هایسز گجه لر
سارا بیر باغدی طبیعتدن آلیب قول بوداقی ----------------- بیر شیرین ماهنیدی یانلیزاوخیار ائل دوداقی
سارا بیر قیزدی سودان سورمه چکبپ گوزلرینه ----------------- جان دییب بیرده اورکدن آرازین سوزلرینه
سارا سئودا ایله دونیانی آنان بیر قیزدی ----------------- او قارانلیق گئجه نی آیدین ائدن اولدوزدی
سارا سودا ایله دونیانی آنان بیر قیزدی ----------------- سارا غملر اوجاقیندا آلیشان بیر کوزدی
بیر نجابتلی گلین دیر ائله آسلان سایاغی ----------------- قویمادی قار ائده دنیاسنی چاقال ایاقی
اوزونی آتدی سئله اوزگنی حیران ائلدی ----------------- اویانان شمعینی پروانیه قربان ائله دی
قوشولوب سللره گتدی آنا یوردون ساراسی ----------------- قالدی شیرین اورگینده یئنه فرهاد یاراسی
باغلادی ساچلارینی قویمادی بیگانه گوره ----------------- آنا یوردون قیزی وئرمز ساچین هر کیمسه هوره
گلین اولدی آرازا اوردا تویون توتدی سارا ----------------- سوئله دی اوردا اورک سوزلرینی نازلی یارا
آراز آغلار گوز ایله آلدی سارای اللرینی ----------------- دارادی ائل قیزینین بیرده قارا تللرینی
گتدی گوزلردن اوزاق دوشدی ائلین بیردنه سی ------- گورمدی خان چوبانین آیریلیقین سون نفسی
سارا گوز لر دن اوزاق دوشسده ایتمز اثری ----------------- بیر یاراق تک سوزونون واردی هله چوخ کسری
