سفارش تبلیغ
صبا ویژن
چون توانایى بیفزاید ، خواهش کم آید . [نهج البلاغه]
لوگوی وبلاگ
 

آمار و اطلاعات

بازدید امروز :11
بازدید دیروز :21
کل بازدید :1063585
تعداد کل یاداشته ها : 113
103/1/10
2:47 ع

امرود آغاجی هاچا
بوداغیندا گول آچا
او یارا قوربان اولوم
دیندیره گؤیلوم آچا
------------
ایگیدین بیر آدی دیر
بیر ده تمیز ذاتی دیر
کوراوغلودا قوچاقلیق
اونون احتیاطیدیر
----------
اوز توتوب قافا داغلار
چیخیبدیر سافا داغلار
بیر دوست بیر وفا اولسا
کیم اونا بفا باغلار؟
------------
اینجیده ن بگدی منی
سارالدان نی دی منی
دوست بیلیب کونول وئردیم
بد یئرده اگدی منی
----------
اصلیم قارامانلیدیر
ائلیم آدلی سانلیدیر
ایگید دویوشده ن گلیر
گوزلری نه قانلیدیر
----------
اوزویونده قاشام من
جؤمردلیکده باشام من
یاخشی گونده گَز دولان
پیس گونده یولداشام من
----------
اووچو بَرَه دن گلیر
داغدان دره دن گلیر
داغدا قار یوخ یاغیش یوخ
بو سئل هارا دان گلیر
----------
اکینی اکن بولر
بئلینی بوکن بولر
آیریلیق نئجه درددی
گوز یاشین توکن بولر
----------
اوت توتوب آلیشارام
هر درده قاریشارام
یاریمین گویلی اولسا
کوسموشدیم باریشارام
----------
اوزکده اوخ آغلارام
درمانیم یوخ آغلارام
علاجسیز درده توشدوم
هامیدان چوخ آغلارام
----------
الینده فانار ایندی
آلیشیب یانار ایندی
سوز ایچینده سوز دئمه
عارف لر قانار ایندی
----------
ایکی قاشین آراسی
اوره گین وار یاراسی
عشق اوتونا یانماسین
هئچ آنانین بالاسی
----------
آسما اوزوم میخدادی
قیزلار یونجالیقدادی
نیلیرم ائولنمکی
لذّت سوبایلیقدادی
----------
استیکانین قانلیدی
ایچمه رم درمانلیدی
بوردا بیر یارسومیشه م
آناسی شیروانلیدی

ali_86
18-08-2008, 23:44
ایگید گره ک آدلانا
آتین مینه آتلانا
مرد اودوکی دویوشنده
هر یارایا قاتلانا
----------
اوخ اتماسن بو داشا
بوق یایا بو داشا
دشمنی ائله وورکی
کله سینده ن بودآشا
----------
اگر سئوسه ائل سنی
یئخابیلمز سئل سنی
نامرده بویون اگمه
قوی آپارسین سئل سنی
----------
ایلدیریم چاخار گئده ر
سو گلیب آخار گئدر
دوستدار پیس گونده گلر
بی وفا باخار گئده ر
----------
اگنیمده وار کؤینکیم
یانیب بو درده کول اولدوم
یامان گونده تک قالدیم
بی وفا دوست گئتدی گالدیم
----------
اللرینده حنا وار
رنگی سولوب گئنه وار
دونیانی گوزل آلسا
محبتیم سنه وار
----------
ائولری دربتده دیر
قیزیل گول پیوتده دیر
او قیزا سوز دئمه یین
سؤگیسی غربتده دیر
----------
الیمه پیچاق دوشوبدی
بیلمیرم هاردان دوشوبدی
من یارا نئینه میشدیم
یار منده ن اوزاق دوشوبدی
----------
الینده بایدا توتار
بایدانی چایدا توتار
ییغلار قوهوم قارداش
هره بیر قایدا توتار
----------
آراز آخار یان وئرر
سسی منه جان وئرر
یاریمی یاخشی باغلا
پیس باغلاسان قان وئرر
----------
ائل کوچر داغا گلی
بولبوللر باغا گلی
نامردین قایداسیدی
جان وئره ن چاغا گلی
----------
اوتور موشدوم اوطاقدا
نه حالدا نه داماقدا
بیر ناغافیل یئل اسدی
گول قالمادی بوتاقدا
----------
الیمده قلم آغلار
یازدیقجا کلام آغلار
بیر درده دوشمیشم کی
گوردوکجه آنام آغلار
ali_86
18-08-2008, 23:47
الیمده وار باغلاما
من گئدیرم آغلاما
بلکه گئتدیم گلمه دیم
نامرده بئل باغلاما
------------
اوره کده یارا سیزلار
درد سیزلار یارا سیزلار
یارالی نین دردینی
نه بولر یاراسیزلار
----------------
اورکیمده یارام وار
دئه گوروم نه چارام وار
سنی دئییب گلمیشم
سن سیز منیم هارام وار؟
----------------
الیمده یایلیقا باخ
گول اوزلی یاریما باخ
چکدیکیم زحمتیمه
آلدیغیم پایما باخ
----------------
الیمده قلمیم وار
قیزیلدان داواتیم وار
یاخیندان گورممیرم
اوزاقدان سلامیم وار
----------------
آغلارام آغلار کیمی
دردیم وار داغلار کیمی
خزل اولوب توکیلدوم
ویرانا باغلار کیمی
----------------
آلیبدیر قادا منی
سالیبدیر درده منی
ایستمدی ائل اوغلو
وئردیلر یادا منی
----------------
آمان آمانا قالدی
حالیم یامانا قالدی
بیرده سنی گورمکیم
آخیر زمانا قالدی
----------------
آی گئتدی باتان یئره
حورولار یاتان یئره
سینه می نشان قویّام
یار اوخون آتان یئره
----------------
امان ناشی الینده ن
سالماز داشی الینده ن
یاسدیق شیکایت ائیلیر
گوزوم یاشی الینده ن
----------------
آی چیخار اوزاق توشر
شمع یانار چراغ توشر
یار گوزوندن توشن لر
کونولده ن ایراق توشر
----------------
آغلارام باشیم گئدر
دورسام یولداشیم گئدر
گئچمرم گوزل یاردان
بولسه م کی باشیم گئدر
----------------
آراز داشاندا ملر
کور قوواشاندا ملر
بالاسی اولموش جیران
داغی آشاندا ملر
----------------
اودا منی یاندیریر
بودا منی یاندیریر
سویوندوم سووا توشدوم
سودا منی یاندیریر
----------------
آغاشلار حاچا حاچا
الیم دولاشدی ساچا
بیر مرد اوغول اولایدی
منی گوریدی قاچا قاچا
----------------
آی چیخار پیشمان
گون چیخار اونا دوشمان
سنه بیر سوز دییرم
نه دوست بیلسین نه دوشمان
----------------
اودلان فلک یا ن فلک
قلبین اولسون قان فلک
کیمسه سینه درد وئریب
کیمسه یه درمان فلک
----------------
اوتایدا یاتان اوغلان
ائلینی ساتان اوغلان
نشانلین آپاردیلار
خبرسیز یاتان اوغلان
----------------
الده عصا یاخشی دیر
یاخشی اوتور یاخشی دیر
یاخشی یورددا پیس اولاد
هیچ قالملسا یاخشی دیر

  
  

دئدیم دئدی

دئدیم: دونیا غمین و شاد ائدن دیر
دئدی: قوخما غم و شادلیق گئدن دیر

دئدیم : یوخ منده بیر ذرّه تحمل
دئدی : گئت ائیله الله توکل

دئدیم : الده ن گئدیب تاب و توانیم
دئدی : صبر ائیله ای روح و روانیم

دئدیم: باطن گؤزه ل دیر یا کی ظاهر
دئدی: باطن ائدر انسانی طاهر

دئدیم: بو دونیا اهلین ،سن نه گوردین
دئدی: بیر کاروان سالار یورغون

دئدیم: بیر عده نین شغلی یالاندی
دئدی: یالان انسانی ارزش دن سالاندی

دئدیم: لاپ پیس نه خصلت دی بشرده ؟
دئدی: یوخدور طمع دن پیس نظرده

دئدیم: آیا ایشیق خوش دور یا کی ظلمت؟
دئدی: وار هر بیرینده چوخلو حکمت

دئدیم: آیا گئجه خوش دور یا کی گوندوز؟
دئدی: خوش دور گئجه، گر چیخسا اولدوز

دئدیم: آیا باهار خوش دور یا کی پاییز؟
دئدی: هر فصل اولار بیر جور دل انگیز

محمود قاضی زاده خسرو شاهی
( ا وزون آرزولار)


  
  

بیر گول اکیدیم بویونجا
ایله مدیم دویونجا
عمروم- کونوم اوزانسین
بو بالامین توینجا
--------------
لایْ لایْ شَکَریم قَندیم
لایْ لایْ اوجا سهندیم
دوُنیا گؤزَل لریندن
من بالامی بَیَندیم
---------------


لای لای دئدیم یاتاسان

قیزیل گوله باتاسان

قیزیل گول سنین اولسون

خرمنینده یاتاسان
---------------
لای لای بئشیگیم لای لای
ائویم ائشیگیم لای لای
اوزون گئجه‌لر بویو
چکیم کئشیگین لای لای
-----------------

لای لای دئدیم ائللردن
شیرین-شیرین دیللردن
آللاه بالامی ساخلا
اوزون آیلار ، ایللردن

------------------


لای لای قوزوم لای لای
آییم، اولدوزوم ، لای لای
سن حاصله چاتینجا
هر درده دوزوم لای لای
-------------------
لای لای چاتمیر داده کیم
هارایا ، فریاده کیم
دور قالادان هارایلا
بلکه گلسین بابکیم

---------------

لای لای دئدیم آدینا
حق یئتیشسین دادینا
بویا باشا چاتاندا
منی ده سال یادینا
-------------
بالامی تانیرام من
هر سوزون قانیرام من
یوخودا آه چکنده
اود توتوب یانیرام من
------------

لای لای بئشیگیم لای لای
ائویم ائشیگیم لای لای
اوزون گئجه‌لر بویو
چکیم کئشیگین لای لای
-----------------
لای لاییْنام یات بالام
گوُن ایله چیْخ بات بالام
من آرزوما چاتمادیم
سن آرزووا چات بالام
-------------
لای لای آهو گؤز بالام
لای لای شیرین سؤز بالام
گؤزَل لیکده دونیادا
تکدی منیم اؤز بالام
---------------
لالاییْنام اؤز بالام
قاشی قارا گؤز بالام
دیلین بالدان شیرین دیر
دوداغیْندا سؤز بالام
------------
لایْ لایْ دیلین دوز بالام
دیل آچ گینان تئز بالام
من اوتوروم سن دانیْش
شیرین شیرین سؤز بالام
-----------------
لای لای بالام گوُل بالام
من سَنَه قوربان بالام
قان ائیلَه مَه کؤنلوُموُ
گَل مَنَه بیر گوُل بالام
--------------

لای لاییْنام گوُل بالام
تئل لَری سوُنبوُل بالام
کَپَنَک دَن سئرچَه دَن
یوخوسو یوُنگوُل بالام
----------------

لایْ لایْ داغ بویو دوزم
آی کؤرپَه املیک قوزوم
بانلادیلار خوروزلار
یوخلا آی دان اولدوزوم
------------------
لایْ لایْ گول بوتام اوغلوم
عطرینه باتام اوغلوم
آرزیْم بودور اؤلمییب
تویونو توتام اوغلوم
----------------
لایْ لایْ گوُلوُم گوُلابیم
آلما ، هئیْوا ، گوُلابیْ م
دریا کیمین گئیینمیش
آیاقدان باشا آبیْم
----------------
لای لای منیم زینتیم
سوُموُیوُم ، قانیم ، اَتیم
داغ کیمین دایاغیْم سان
سَن سَن منیم جوُراَتیم
---------------
لایْ لایْ دئدیم جان دئدیم
یوخودان اویان دئدیم
سن یئری بیر من باخیْم
جان سنه قوربان دئدیم
----------------
بالاما لایْ لایْ دئدیم
یاتمادی لایْ لایْ دیدیم
کوُچَه دَه اوینویاندا
ییْخیْلدی ائی وای دئدیم
------------------
لایْ لایْ شَکَریم قَندیم
لایْ لایْ اوجا سهندیم
دوُنیا گؤزَل لریندن
من بالامی بَیَندیم
-------------------
لایْ لایْ گوُلوُم باهاریْم
قیش گوُنوُندَه زوماریْم
یاشاییْشیْن باغیندا
دادلی ، تاملی ، نوباریم
---------------
لای لای دئدیم گونده من
کؤلگه‌ده سن گون‌ده من
ایلده قوربان بیر اولسا
سنه قوربان گونده من
---------------
لای- لای دئدیم یاتاسان
قیزیل گوله باتاسان
قیزیل گولون ایچینده
شیرین یوخو تاپاسان


  
  

پاییزین آخرلری

آلدی خزان رنگی بوتون چؤللری
کؤچمه خیالی گوتوروب ائللری

هر بیر آغاج بیر ساری کؤینک گئییب
باغ باشا-باش غصه و غمدن دئییب

بیر یئل اسیر مین دانا یارپاق تؤکور
یئل آغاجین پالتارینی هی سؤکور

قیرمیزی، آغ، صورتی گوللر سولوب
باغ ائله بیل جنگیده غارت اولوب

گلمیری هئچ باغچادا بولبول سسی
آچمیری دای تاج خوروز،اطلسی

قمری اوچوب گؤیده قاناد چالمیری
باغدا گؤیرچین یوواسی قالمیری

یازکی ده گیل لاله چراغ تک یانا
سؤندی چراغ، تا اوره گیم داغلانا

گول تؤره دن قیرمیزی گل بسله میر
باغدا بالا اوغلونو دای سسله میر

یا قارا قارقا آغاج اوسته قونور
یا آلا بایگوش دیوار اوسته دونور

گرچه بولاق گونده گلیر گؤل دولور
گؤلده سو بیر پارچا بلور تک اولور

قیش یئتیشیرقار توتاجاق داغلاری
کیم سایاجاق شاختا ووران باغلاری؟

بیر قوجا باغبان ائله چؤلده قالیب
لشکر غم کشور جانین آلیب

گؤردو منی بینوا گلدی دیله
کیمدی منیم قدریمی ایندی بیله؟

شاختا دوشوب هاممی کؤچوب گئتدیلر
هاممی سی بیردن منی ترک ائتدیلر

هاممی قویوب گئتدی، قالان اولمادی
هئچ منی بیر یادا سالان اولمادی

محمود قاضی زاده خسرو شاهی
( ا وزون آرزولار)


  
  

گئتمه ترسا بالاسی

اذن وئر توی گئجه سی من ده سنه دایه گلیم
ال قاتاندا سنه مشاطه ، تماشایه گلیم

سن بو مهتاب گئجه سی سئیره چیخان بیر سرو اول
اذن وئر ، من ده دالینجا سورونوب سایه گلیم

منه ده باخدین او شهلا گوزونله ، من قارا گون
جرئتیم اولمادی بیر کلمه تمنایه گلیم

من جهنم ده ده باش یاسدیقا قویسام سنیله
هئچ آییلمام کی دوروب جنت مآوایه گلیم

ننه قارنیندادا سنله آکیز اولسیدیم اگر
ایسته مزدیم دوغولوب بیرده بو دونیایه گلیم

سن یاتیب جنتی رؤیاده گؤرنده گئجه لر
من ده جنتده قوش اوللام ، کی او رؤیایه گلیم

قیتلیغ ایللر یاغشی تک قورویوب گؤز یاشیمیز
کوی عشقینده گرک بیرده مصلایه گلیم

سن ده صحرایه مارال لار کیمی بیر چیخ ، نولی کی
من ده بیر صیده چیخانلار کیمی ، صحرایه گلیم

آللاهیندان سن اگر قورخموییب ، اولسان ترسا
قورخورام من ده دؤنوب دین مسیحایه گلیم

شیخ صنعان کیمی دونقوز اوتاریب ایللرجه
سنی بیر گؤرمک اچون معبد ترسایه گلیم

یوخ صنم! آنلامادیم ، آنلامادیم ، حاشا من
بوراخیم مسجیدیمی ، سنله کلیسایه گلیم!

گل چیخاق طور تجلایه ، سن اول جلوه ی طور
من ده موسی کیمی ، او طوره تجلایه گلیم

شیردیر (( شهریار )) ین شعری ، الینده شمشیر
کیم دئیه ر من بئله بیر شیرله دعوایه گلیم


  
  
<      1   2   3   4   5   >>   >