پاییزین آخرلری
آلدی خزان رنگی بوتون چؤللری
کؤچمه خیالی گوتوروب ائللری
هر بیر آغاج بیر ساری کؤینک گئییب
باغ باشا-باش غصه و غمدن دئییب
بیر یئل اسیر مین دانا یارپاق تؤکور
یئل آغاجین پالتارینی هی سؤکور
قیرمیزی، آغ، صورتی گوللر سولوب
باغ ائله بیل جنگیده غارت اولوب
گلمیری هئچ باغچادا بولبول سسی
آچمیری دای تاج خوروز،اطلسی
قمری اوچوب گؤیده قاناد چالمیری
باغدا گؤیرچین یوواسی قالمیری
یازکی ده گیل لاله چراغ تک یانا
سؤندی چراغ، تا اوره گیم داغلانا
گول تؤره دن قیرمیزی گل بسله میر
باغدا بالا اوغلونو دای سسله میر
یا قارا قارقا آغاج اوسته قونور
یا آلا بایگوش دیوار اوسته دونور
گرچه بولاق گونده گلیر گؤل دولور
گؤلده سو بیر پارچا بلور تک اولور
قیش یئتیشیرقار توتاجاق داغلاری
کیم سایاجاق شاختا ووران باغلاری؟
بیر قوجا باغبان ائله چؤلده قالیب
لشکر غم کشور جانین آلیب
گؤردو منی بینوا گلدی دیله
کیمدی منیم قدریمی ایندی بیله؟
شاختا دوشوب هاممی کؤچوب گئتدیلر
هاممی سی بیردن منی ترک ائتدیلر
هاممی قویوب گئتدی، قالان اولمادی
هئچ منی بیر یادا سالان اولمادی
محمود قاضی زاده خسرو شاهی
( ا وزون آرزولار)
